Po vonohej për ta zënë aeroplanin, alarmon për bombë!

Një shtetas i Indisë, pasi që po vonohej për ta kapur aeroplanin për në Moskë, ka zgjedhur rrugën më të shkurtë për ta vonuar atë: ka alarmuar dje në pasditen e djeshme në sportel se në aeroplanin rus kishte bomba

Sërish alarmi për bomba në aeroportin e Gjenevës rezulton të ketë qenë një blof, madje nga më banalët! Një shtetas i Indisë, pasi që po vonohej për ta kapur aeroplanin për në Moskë, ka zgjedhur rrugën më të shkurtë për ta vonuar atë: ka alarmuar dje në pasditen e hershme në sportel se në aeroplanin rus kishte bomba, shkruan le matin.

Lajmi është publikuar gjerësisht dje në mediat zvicerane dhe në albinfo.ch.

Më vonë policia ka konstatuar se e gjithë kjo ka qenë një shaka por shaka e pakripë, të cilën sigurisht indiani do ta paguajë: ndaj tij tashmë është nisur procedura penale.

Për vonesën e tij, 115 pasagjerë u desh të pësonin tronditje dhe të maltretoheshin duke u zbritur nga aeroplani e të kontrolloheshin imtësisht, transmeton albinfo.ch. Veç kësaj, ata u detyruan të transportoheshin me avionë të tjerë dhe pas një vonese të konsiderueshme.

Shtetasi indian jeton në kantonin Vaud me vizë C.

Vetëm pak muaj më parë, një grua xheloze, për të ndaluar bashkëshortin e saj që të fluturonte, siç dyshonte ajo, te e dashura e tij, kishte alarmuar po në këtë aeroport për ekzistim bombash në aeroplan. Ajo pastaj e kishte marrë dënimin me një gjobë të majme.