Veteranët e Luftës së UÇK-së kanë përfunduar protestën në mënyrë paqësore. 

Ata kërkuan dorëheqjen e kryeministrit Albin Kurti dhe shefes së Grupit Parlamentar të Lëvizjes Vetëvendosje, Mimoza Kusari Lila, pas publikimit të audio-incizimeve, ku dëgjohet duke u koordinuar me Listën Serbe për ligjin për pagën minimale, që lë jashtë veteranët, përcjell albinfo.ch. 

Luftëtari i UÇK-së, Avni Ajeti, paraqiti kërkesat e veteranëve. 

“Kush do ta kishte menduar, gati 25 vjet pas përfundimit të luftës, duhet të dilnim këtu për të kërkuar edhe një herë liri dhe të drejtat tona. Sot ato nuk po na mohohen nga një regjim i tmerrshëm i Millosheviqit, por nga Qeveria e shtetit për të cilin dhamë gjithçka. Por dita paska ardh. Sot jemi para Qeverisë, të cilën e kemi çliruar me gjak e sakrificë. Për veteranët e UÇK-së ende po veten kriminelët serbë. Kjo nuk na kallxon befasi. Ne edhe sulmet e befasishme të armikut i kemi kthyer në kundërsulm. Jemi këtu që me fjalën e lirë për trajtimin e padinjitetshëm që po na bëhet në kufi të tradhtisë. Për të drejtat tona dhe për ta kundërshtuar këtë Qeveri që po merr direktiva nga Serbia. Në koordinimin me Rajdoiçiqin, i la veteranët jashtë pagës minimale. Presidente Vjosa Osmani, mos e dekreto ligjin që i përbuz veteranët, përndryshe do të përballeni me ne, me protesta të vazhdueshme”, tha ai.