Pas Venezuelës, një tërmet i fuqishëm goditi edhe Japoninë

Tërmet 5.8 ballë godet Japoninë, lëkundet edhe zona e Tokios

Një tërmet me magnitudë 5.8 ballë ka goditur prefekturën Chiba në Japoni të premten, duke shkaktuar lëkundje edhe në zonat pranë Tokios, por pa pasoja të mëdha dhe pa paralajmërim për cunami, sipas autoriteteve japoneze dhe Shërbimit Gjeologjik të SHBA-së (USGS), përcjell albinfo.ch.

Agjencia Meteorologjike e Japonisë njoftoi se tërmeti ka ndodhur në orën 12:46 sipas kohës lokale, me epiqendër në prefekturën Chiba dhe në një thellësi prej rreth 50 kilometrash, raportojnë mediat vendase.

Sipas agjencisë, tërmeti ka regjistruar intensitet maksimal sizmik prej 4 ballë në shkallën shtatë-nivelëshe të Japonisë dhe nuk paraqet rrezik për cunami.

Ndërkohë, USGS bëri të ditur se tërmeti ishte me magnitudë 5.8 ballë, me epiqendër rreth 4 kilometra në jug-juglindje të Yokoshibas dhe në një thellësi prej rreth 56 kilometrash.

Autoritetet kanë konfirmuar se deri më tani nuk ka raportime për viktima apo dëme të konsiderueshme. /Albinfo.ch

---