Në portin e ri të Durrësit do të hapen 50 mijë vende të reja pune

Investitori Mohamed Alabbar ka deklaruar se fillimi i vitit të ardhshëm do të shënojë edhe hapat e parë për ndërtimin e Portit Turistik të Durrësit, përcjell albinfo.ch.

Në një intervistë televizive, themeluesi i “Emaar Properties”, Mohamed Al Alabbar, thekson se ky port do të jetë një nga marinat më të mëdha të Mesdheut.

“Është shpallur tenderi ynë i parë i ndërtimit. Kështu që të mos gabohem, presim që në rreth 4 javë të marrim çmimet e ofertës dhe pasi të kalojë kjo fazë, shpresoj që për një muaj e gjysmë apo dy muaj të instalojmë vinçat dhe të fillojmë punën”, u shpreh Alabar.

Ai bëri të ditur se “gjatë këtyre tre vjetëve kam negociuar për këtë projekt dhe me të vërtetë respektoj atë që po bën shkëlqesia e tij, Edi Rama. Më pëlqen zemra e tij, mendon për popullin, i bën punët të pastra, premton dhe realizon, pavarësisht presionit politik”.

Alabbar thekson se në këtë kompani është ortaku kryesor dhe vendimmarrësi, por që ka edhe partnerë e tij në Lindjen e Mesme.

“Zakonisht, projekte të mëdha si ky duhet t’i shtojnë prodhimit të brendshëm bruto rreth 4-5% të prodhimit të brendshëm bruto të qytetit. Studimet tona gjithmonë e tregojnë, por përsa i përket turizmit, është i jashtëzakonshëm. Ju premtoj që nëse do e bëjmë projektin siç duhet, çdo turist që do vijë në Shqipëri, 90% e tyre do të vijnë këtu”, u shpreh ai gjatë intervistës televizive.

Themeluesi i “Emaar Properties” deklaroi se në portin turistik të Durrësit do të hapen rreth 40-50.000 vende të reja pune.