Parlamenti pro iniciativës kundër pedofilisë

97 vota kanë qenë në favor të iniciativës 91 kundër dhe 7 abstenime

Dhoma Nacionale e Parlamentit të Zvicrës ka ndryshuar qëndrimin e saj brenda një kohe fare të shkurtër. Kështu, vetëm rreth një javë me parë ajo kishte vendosur me shumicë votash kundër iniciativës për dënimin më të ashpër të pedofilëve ndërsa sot, në votimin përmbyllës shumica e deputetëve kanë vendosur ndryshe, gjegjësisht pro iniciativës.

97 vota kanë qenë në favor të iniciativës 91 kundër dhe 7 abstenime.

Sipas iniciativës, pedofilët e dënuar nuk do të kenë të drejtë kurrë të punojnë në ndonjë vend pune ku kane të bëjnë me fëmijë. Por, Qeveria Federale ashtu sikurse edhe Dhoma e Kantoneve e Parlamentit e kanë kundërshtuar iniciativën e përmendur.

Kritikët e iniciativës së ashpërsimit të qasjes ndaj pedofilisë, në mes të cilëve edhe qeveria, thonë se ligji duhet të ketë përjashtime. Fjala vjen, nuk duhet të dënohet për të mos punuar me fëmijë një i ri 19 vjeçar që ka pasur marrëdhënie seksuale me një 15 vjeçare, thonë ata.

Në gjendjen e tashme, iniciativa mund të kalojë për referendum pa pasur nevojë për rekomandim zyrtar.