Parlamenti kundër iniciativës për Pedofilinë

Sipas parlamentarëve në një rast ekstrem iniciativa do të ndëshkonte edhe njerëzit që nuk meritojnë të ndëshkohen.

Dhoma Nacionale e Parlamentit të Zvicrës ka hedhur poshtë një iniciativë sipas të cilës të dënuarit për pedofili duhet tu ndalohet ushtrimi i profesionit për tërë jetën. Vendimi refuzues i deputeteve është marrë e një shumicë shumë të ngushtë, 89 pro, 88 kundër dhe 14 të përmbajtur.

Të gjithë folësit në parlament kanë qenë të mendimit se teksti i iniciativës paraqet një shqetësim legjitim në vete. Mirëpo shumica e tyre mendojnë se ajo shkon tepër larg. Sepse, arsyetojnë ata, në një rast ekstrem iniciativa do të ndëshkonte edhe njerëzit që nuk meritojnë të ndëshkohen.

Si shembull ata japin rastin kur një i ri 19 vjeçar kryen marrëdhënie intime me miken e tij 15 vjeçare dhe nëse dënohet, ai nuk do të ketë të drejtë tërë jetën të punojë në ndonjë profesion që lidhet me fëmijë. Për këtë arsye Dhoma Nacionale planifikon që vetëm të bëhet ashpërsimi i ligjit në pikat që kontestohen. Qeveria Federale ka tashme para vetes një projektligj për këtë fushë.