Paralajmërohet rritje e çmimeve të fluturimeve në Evropë

Kreu i Shoqatës Ndërkombëtare të Transportit Ajror, Willie Walsh, thotë se kostot e larta të karburantit të avionëve do të reflektohen në çmimet e biletave për udhëtarët.

Çmimet e biletave të avionëve në Evropë pritet të rriten në periudhën e ardhshme për shkak të rritjes së kostove të karburantit të aviacionit. Paralajmërimi vjen nga kreu i Shoqatës Ndërkombëtare të Transportit Ajror, Willie Walsh, i cili theksoi se rritja e çmimeve është “e pashmangshme”, përcjell albinfo.ch.

Sipas Walsh, edhe pse disa kompani ajrore në Evropë kanë ulur përkohësisht çmimet e biletave për shkak të kërkesës më të ulët, këto tarifa nuk mund të mbahen për një kohë të gjatë përballë kostove në rritje të karburantit.

Në një intervistë për BBC, ai ka paralajmëruar gjithashtu për shqetësime lidhur me furnizimin me karburant gjatë muajve të verës në Mbretërinë e Bashkuar, megjithëse ka theksuar se aktualisht nuk ka arsye për panik.

Walsh ka nënvizuar se edhe nëse Ngushtica e Hormuzit do të rihapej menjëherë, pasojat e ndërprerjeve të furnizimit të shkaktuara nga tensionet dhe konfliktet në Lindjen e Mesme mund të vazhdojnë të ndikojnë tregun edhe gjatë vitit të ardhshëm.

Ndërkohë, një zëdhënës i qeverisë së Mbretërisë së Bashkuar ka deklaruar se kompanitë ajrore britanike aktualisht nuk po përballen me mungesë të karburantit për avionë.

Mbyllja e Ngushticës së Hormuzit për shkak të tensioneve në Iran ka ndikuar ndjeshëm në rritjen e çmimeve të karburantit të aviacionit dhe ka ngritur shqetësime për mungesa të mundshme në muajt e ardhshëm.

Evropa, dhe veçanërisht Mbretëria e Bashkuar, varen në masë të madhe nga importet e karburantit nga ky rajon, duke i detyruar autoritetet dhe kompanitë ajrore të kërkojnë burime alternative furnizimi.

Së fundmi, Bashkimi Evropian ka bërë të ditur se nuk ekziston asnjë pengesë rregullatore për përdorimin e karburantit amerikan për avionë nga linjat ajrore evropiane, për sa kohë që përdorimi i tij menaxhohet me kujdes./Albinfo.ch

---