Papunësia në Shqipëri bie në nivelin më të ulët prej 32 vjetësh

Foto ilustrim

Papunësia në Shqipëri ka rënë në nivelin më të ulët në 32 vjet. Ky konstatim del referuar shifrave zyrtare. Të dhënat nga Instituti i Statistikave tregojnë se në 3-mujorin korrik- shtator, vetëm 10.6 për qind e shqiptarëve mbi 15 vjeç nuk morën një rrogë nga mbi 12 për qind në po të njëjtin hark kohor të 2018-s.

Në rekordin historik të më shumë se tre dekadave tranzicioni, ndikim në shtimin e vendeve të punës e kanë pasur bujqësia dhe turizmi, sektorë ku në krahasim me tremujorin e tretë të një viti më parë, punësimi është rritur respektivisht me 6.5 dhe 4.7 për qind. Ndërsa në rënie paraqiten shifrat tek industria e prodhimit.

Mungojnë profesionistët

Por, pavarësisht shtimit të një numri të konsiderueshëm të shqiptarëve në forcat e punës, tregu sot shfaq ende shumë etje për krah pune dhe veçanërisht në profesione, apo siç njihen ndryshe: zeje, shkruan a2, përcjell albinfo.ch.

Dhe, që edhe të tjera zanate të mos humbin një herë e përgjithmonë, nevojitet ndërhyrje nga institucionet, thotë përfaqësuesi i zejtarëve.

Referuar të dhënave nga INSTAT, te grupmosha 15 deri në 29 vjeç niveli i papunësisë është sa 2-fishi i asaj te popullata e përgjithshme me 20.5 për qind, duke u rritur krahasuar me një vit më parë.