Pandemia: ‘Gati e pamundur të mbash një restorant’

Covid-19 ka prekur gjithë botën. Që nga zanafilla e manifestimit të kësaj pandemie, ekonomia në gjithë botën është lëkundur.

Si rezultat i karantinimit dhe frikës nga pandemia shumë njerëz kanë ralluar drekat e darkat nëpër restorante, e këto të fundit kanë pësuar shumë.

Kuzhinierja izraelite, Einat Admony, e cila ka restorant në New York dhe është autore e librave të gatimit, ka shpresë për vitin e ardhshëm. “Ndryshimi po vjen”, thotë ajo. Edhe pse është detyruar të mbyllë përgjithmonë restorantin e saj gjatë pandemisë, Admony është akoma duke operuar në restorantet e saj të tjera.

“Unë me të vërtetë shpresoj se pronarët do të marrin ndonjë ndihmë nga qeveria, kështu që ata nuk do të kenë nevojë që qiratë e tyre të jenë kaq të larta dhe njerëzit në të vërtetë mund të hapin restorante dhe nuk do të duhet të paguajnë shumë. Për mua, ishte shumë e vështirë të kesh kaq shumë konkurrencë në New York, veçanërisht nga njerëzit që nuk vijnë nga industria”, ka thënë ajo.

Ajo prapëseprapë beson që e gjithë kjo do të përfundojë.

“Unë jam një person kaq optimist, dua të besoj se kjo do të përfundojë dhe do të jetë në rregull në fund. Shpresoj që deri në vitin e ardhshëm, bota do të kthehet ngadalë në normalitet”, ka shtuar ajo, shkruan Huffpost, përcjell albinfo.ch.