Pajisja me targat RKS, fushata shpjegon mënyrën e aplikimit

Fushata informuese u drejtohet qytetarëve të cilët posedojnë targat “PR”, “KM”, “PZ”, “GL”, “UR”, “PE”, “DA”, apo “ĐA”.

Ministria e Punëve të Brendshme dhe institucionet përkatëse të Kosovës po vazhdojnë fushatat informuese për qytetarët për pajisje me targa “RKS”, raporton Albinfo.ch.

Fushata informuese u drejtohet qytetarëve, të cilët posedojnë targat “PR”, “KM”, “PZ”, “GL”, “UR”, “PE”, “DA”, apo “ĐA”.

Nga data 1 shtator 2022 deri më 31 tetor 2022 ata kanë mundësi të pajisen me targa RKS dhe përmes fushatës atyre u shpjegohet mënyra e aplikimit.

Të gjitha fushatat, si video-spotet, komunikatat njoftuese, banerat dhe fletushkat, iu janë adresuar dhe shpërndarë të gjithë qytetarëve pa dallime (në gjuhët shqipe dhe serbe), me qëllim të informimit të tyre me kohë, dhënies së sqarimeve të nevojshme për procedurat dhe kriteret e parapara për pajisje me targa “RKS”.

“Ministria e Punëve të Brendshme është e angazhuar dhe do të vazhdojë të angazhohet maksimalisht për informimin e qytetarëve, asistimin në ndjekjen e hapave të nevojshme dhe mbarëvajtjen e procesit”, thuhet në kumtesën e kësaj ministrie.

Tutje theksohet se Qendrat e Regjistrimit të Automjeteve kanë vazhduar më tej me përgatitjet në të gjitha komunat në Republikën e Kosovës, për të mirëpritur të gjithë pronarët e automjeteve./Albinfo.ch

---