Paditet kufitari që nuk i ka ofruar ndihmë refugjates shtatzënë

Bashkëshorti i saj ka thënë pastaj se rojat zvicerane të kufirit, përkundër thirrjeve të përsëritura për ndihmë, nuk kishin reaguar fare

Një pjesëtar i formacionit të rojave kufitare të Zvicrës do të përballet me gjyqin. Autoritetet gjyqësore të Ushtrisë kanë ngritur padi ndaj tij për mosdhënie të ndihmës, rrezikim jete dhe shpërfillje të rregullave të shërbimit.

Roja në fjalë, në vitin 2014 kishte përcjellë për Itali një refugjate siriane e cila ishte duke kaluar dhembjet e lindjes, pa i ofruar ndihmë, shkruan srf.ch. Ajo po përjetonte gjakderdhje të rëndë dhe menjëherë pas kalimit të kufirit (me tren), në Domodossola, në Itali pasi ishte alivanosur, kishte lindur foshnjën e vdekur, transmeton albinfo.ch.

Bashkëshorti i saj ka thënë pastaj se rojat zvicerane të kufirit, përkundër thirrjeve të përsëritura për ndihmë, nuk kishin reaguar fare.