Osmani: Qytetarët nuk duhet të ndëshkohen për shkak të politikanëve

Presidentja e Kosovës, Vjosa Osmani, ka thënë se deklarimet e saj me ndërkombëtarët nuk janë në asnjë moment kërcënime, por janë biseda të hapura dhe të sinqerta. Ajo i bëri komentet teksa foli për politikën e jashtme dhe marrëdhënien me ndërkombëtarët.

“Kam mësuar sepse asnjëri nuk jemi perfekt, kam mësuar më shumë nga partneri ynë strategjik SHBA, që sinqeriteti me partnerët, e të jemi të hapur me ta në mënyrë që të dinë se çfarë të presin me ne, është vlerësuar më së shumti. Ky nuk është kërcënim është informim në raport me partnerët tanë, nëse nuk janë të kënaqur me veprimet e qeverisë së republikës së Kosovës, apo të presidentes, apo institucioneve në përgjithësi, ndëshkimi nuk duhet të jetë në lidhje me popullin e Kosovës”, tha Osmani në një intervistë në TCH, përcjell Albinfo.ch.

Në mënyrë të veçantë në këtë rast, Osmani foli për liberalizimin e vizave, duke thënë se është një padrejtësi historike mungesa e liberalizimit të vizave për popullin e Kosovës, pasi siç tha, është i vetmi popull në kontinent, që është 100% në linjë të plotë me çdo vendim të politikës së jashtme.

“Dhe kjo çështja e liberalizimit të vizave është një padrejtësi historike ndaj popullit të Kosovës, ta konsiderosh si një popull që e meriton geton, nënkupton ta vlerësosh si një popull të shkallës së dytë apo të tretë dhe të mos e vlerësosh faktin që është populli më pro-evropian në kontinentin tonë, është 100% në linjë të plotë me çdo vendim të politikës së jashtme. Unë jam e bindur që Macron i vlerëson të gjitha këto prandaj qëllimi im është që të gjithë aleatët tanë të kuptojnë se çfarë e dëmton procesin e dialogut. Unë mendoj që me presidentin Macron e me gjithë të tjerët të jemi të sinqertë e të flasim hapur, por në asnjë moment nuk kam përdorur tone kërcënuese. Pa aleatët asnjë sukses i yni nuk do të ishte i yni”, u shpreh presidentja Osmani./Albinfo.ch/