OKB: Numri i viktimave në Derna të Libisë, mbi 11 mijë

Këto shifra kundërshtohen nga zyrtarët libianë

Stuhia e 10 shtatorit ka lënë të vdekur rreth 11300 persona vetëm në qytetin Derna, ka njoftuar Zyra për Koordinim të Çështjeve Humanitare e Kombeve të Bashkuara.

Shifrat janë kundërshtuar nga zyrtarët, të cilët thanë se numri është shumë më i vogël.

Agjencia e Organizatës së Kombeve të Bashkuara ka njoftuar se edhe 10000 persona konsiderohen të zhdukur në Derna, ndërkaq 170 të tjerë kanë vdekur nga vërshimet në pjesë të tjera në lindje të Libisë.

Sipas njoftimit, agjencia për shifrat i referohet Gjysmëhënës së Kuqe libiane, por një zëdhënës i këtij grupi të ndihmës u shpreh i habitur nga shifra e paraqitur.

“Në çfarë burimesh thirren këto shifra. Numri zyrtar publikohet nga agjenci të autorizuara nga autoritetet libiane”, tha Tawfiq al-Shukri për DPA, përcjell albinfo.ch.

Më herët gjatë kësaj jave kryetari i Dernas tha se në këtë qytet mund të kenë vdekur deri në 20000 persona.

Dje qeveria në lindje tha se numri zyrtar i viktimave është 3252, teksa OBSH ka thënë se afro 4000 persona të vrarë nga vërshimet janë identifikuar.

 

---