“Një për të gjithë, të gjithë për një”, historia e motos jozyrtare që bashkon Zvicrën

Edhe pse nuk është e përcaktuar në Kushtetutë, shprehja latine “Unus pro omnibus, omnes pro uno” është bërë simboli më i njohur i unitetit dhe solidaritetit zviceran.

Zvicra nuk ka një moto zyrtare të përcaktuar në Kushtetutë apo në ligj. Megjithatë, prej më shumë se një shekulli, shprehja latine “Unus pro omnibus, omnes pro uno”, që do të thotë “Një për të gjithë, të gjithë për një”, është bërë simbol i unitetit dhe solidaritetit të vendit. Sot ajo konsiderohet gjerësisht si motoja jozyrtare e Konfederatës Zvicerane.

Sipas Swissinfo, kjo shprehje mori rëndësi të veçantë në gjysmën e dytë të shekullit XIX, gjatë krijimit të shtetit modern federal. Pas zjarrit të madh në Glarus në vitin 1861 dhe përmbytjeve të vitit 1868, autoritetet dhe mediat e përdorën moton në fushatat kombëtare për mbledhjen e ndihmave, duke nxitur solidaritetin ndërmjet kantoneve dhe qytetarëve.

Me kalimin e viteve, motoja u bë pjesë e identitetit zviceran dhe sot përdoret shpesh në raste krizash, festash kombëtare dhe ngjarjesh zyrtare për të theksuar frymën e bashkëpunimit dhe përgjegjësisë së përbashkët. Madje, versioni i saj latin është i gdhendur edhe në kupolën e Pallatit Federal në Bernë, selisë së Parlamentit dhe Qeverisë së Zvicrës.

Edhe pse shumë e lidhin këtë shprehje me romanin “Tre Muskëtierët” të Alexandre Dumas, në Zvicër ajo ka marrë një kuptim krejtësisht të veçantë. Ajo simbolizon bashkëjetesën e katër komuniteteve gjuhësore, bashkëpunimin mes 26 kantoneve dhe vlerat mbi të cilat është ndërtuar shteti federal zviceran.

---