Austria ka miratuar blerjen e planifikuar të Ceconomy, kompanisë mëmë gjermane të MediaMarkt, nga gjiganti kinez i teknologjisë JD.com, por vetëm me kushte të rrepta.
Ministria e Ekonomisë, përgjegjëse për shqyrtimin e investimeve, deklaroi se po mbron “të dhënat, zinxhirët e furnizimit dhe vendimet e personelit me rëndësi për sigurinë” përmes kërkesave detyruese.
Ministri i Ekonomisë, Wolfgang Hattmannsdorfer (nga partia ÖVP), iu referua kuadrit ligjor për të mos dhënë detaje të mëtejshme mbi këto kushte.
“Këto janë kushte të rrepta,” tha ministri. “Veçanërisht në kohë tensionesh gjeopolitike, ne duhet të mbrojmë sovranitetin tonë.” MediaMarkt është shitësi më i madh në Evropë i pajisjeve elektronike të konsumit dhe pajisjeve shtëpiake.
Në Austri, kompania operon me 56 dyqane, gjeneroi të ardhura prej rreth 1.3 miliardë eurosh në vitin financiar 2025/26 dhe punëson rreth 2,400 persona.
Vendimi i BE-së ende në pritje
Komisioni Evropian ka kohë që po shqyrton blerjen e planifikuar të shitësit më të madh evropian të elektronikës nga JD.com, shkruan theinternational. Një vendim përfundimtar pritet të merret deri më 4 nëntor. Miratimi nga Austria pason vendime të ngjashme në Francë, Itali dhe Gjermani, ku Ministria e Ekonomisë dha dritën jeshile në fund të qershorit, transmeton albinfo.at.
Në prill, JD.com kishte tërhequr një kërkesë fillestare të bërë sipas ligjit austriak për shqyrtimin e investimeve, përpara se të dorëzonte një kërkesë të re në ministrinë në Vjenë gjatë muajit korrik.
Procesi i shqyrtimit të investimeve në Austri përfshin blerjet nga investitorë jashtë Bashkimit Evropian në sektorë me rëndësi për sigurinë, siç janë furnizimi me energji, infrastruktura kritike, teknologjitë kyçe dhe qasja në të dhëna të ndjeshme.
Ministria shqyrton strukturën e pronësisë, ndikimin e mundshëm të investitorit dhe rreziqet e mundshme për sigurinë ose rendin publik. Rezultatet mund të variojnë nga miratimi pa kushte, miratimi me kushte detyruese sigurie, e deri te ndalimi i plotë i transaksionit.
