Një ish-polic serb raportohet se është arrestuar në veri të Mitrovicës

Dyshohet për krime lufte

Policia e Kosovës raportohet se ka arrestuar dje S.T. një ish-pjesëtar i Policisë së Kosovës, i dyshuar për krime lufte, përcjell albinfo.ch.

I arrestuari i takon nacionalitetit serb dhe ka dhënë dorëheqje nga Policia e Kosovës në valën e dorëheqjes së serbëve nga institucionet e Kosovës.

Mediat serbe raportojnë se familjarët e të njëjtit kanë konfirmuar se ish-polici serb ishte arrestuar, transferuar në Prishtinë dhe se akuzohet për krime lufte.

Policia ende nuk ka dhënë një konfirmim zyrtar në lidhje me këtë rast.

Pjesa veriore e Kosovës vazhdon të mbetet e bllokuar, shtatë ditë pas vendosjes së barrikadave nga serbët në shenjë proteste për arrestimin e ish-policit Dejan Pantiq.

Që nga e shtuna kur u vendosën barrikadat në Rudar, ato vazhdojnë të jenë aty përkundër thirrjeve të ndërkombëtarëve që ato të hiqen. Pikat kufitare në Jarinjë e Bërnjak vazhdojnë të jenë të mbyllura edhe në ditën e shtatë, ndërkaq u raportua se dje është vendosur edhe barrikada e katërt.

---