Një delegacion parlamentar serb vjen për vizitë në Zvicër

Këmbimi ndërparlamentar organizohet nga DEZA (Drejtoria për Zhvillim dhe Bashkëpunim) në partneritet me UNDP-në (Programi i OKB-së për Zhvillim)

Nga 14 deri më 19 në Zvicër do të qëndrojë një delegacion i Parlamentit të Serbisë, me qëllim njohjen e sistemit politik të Zvicrës, standardet dhe zakonet e këtushme. Ky projekt i vizitës pritet të japë nxitjen e nevojshme për reformën e legjislativit serb që mbështetet nga DEZA.

Programi disaditësh përmban disa pika të fokusimit: transmetimi i një pasqyre mbi sistemin politik të Zvicrës dhe mbi financat publike në nivel federal dhe të kantoneve, pastaj vëzhgimi i sistemit parlamentar përmes vizitës së Parlamentit të Zvicrës dhe debatit me parlamentarët zviceranë, me anëtarët e komisioneve, të kontrollit financiar federal, të komunikimit të parlamentit me mediet etj.

Këmbimi ndërparlamentar organizohet nga DEZA (Drejtoria për Zhvillim dhe Bashkëpunim) në partneritet me UNDP-në (Programi i OKB-së për Zhvillim), bëhet e ditur në një komunikatë të Ministrisë së Jashtme të Zvicrës.

Në delegacionin serb marrin pjesë nëntë anëtarë të Parlamentit dhe të komisioneve të tij dhe drejtori i organit mbikëqyrës të financave të Serbisë. Delegacioni shoqërohet nga dy bashkëpunëtorë të Zyrës për bashkëpunim të DEZA-s në Beograd.

Vizita e parlamentarëve serbë është një element i rëndësishëm i kooperimit në kushte të tranzicionit me Serbinë, parlamenti i së cilës prej shumë vitesh po bën përpjekje për përfaqësimin e qytetarëve në forcimin e rolit ligjdhënës dhe të funksioneve mbikëqyrëse, thuhet në komunikatë. Në mes të vitit 2009 dhe 2012 ky parlament ka proceduar 800 ligje dhe 200 rregullore.

Vullneti për jetësimin e shpejtë të reformave dhe për përparimin e vendit, me vështrimin drejt synimit për hyrje në BE është i fuqishëm. Por është konstatuar se transparenca dhe pjesëmarrja e komunitetit duhet të përmirësohen . Zvicra mbështet Serbinë në proceset e pritshme të reformimit të legjislativit si në nivel nacional ashtu dhe në nivel të parlamenteve të komunave.