Nga Ferizaji në Bundesligë: Lumbardha Misini bën historinë

Ambasadori i Republikës së Kosovës në Gjermani, Faruk Ajeti, ka bërë të ditur se futbollistja e Kombëtares së Kosovës, Lumbardha Misini, ka kompletuar transferimin te Bayer Leverkusen, me të cilin ka nënshkruar kontratë deri në vitin 2029.

Sipas Ajetit, ky transferim përbën një moment historik për futbollin kosovar, pasi Misini bëhet futbollistja e parë nga Kosova që do të luajë në Bundesligën gjermane, një nga kampionatet më të forta të futbollit të femrave në Evropë.

Në reagimin e tij, ambasadori rikujtoi rrugëtimin sportiv të Misinit, e cila karrierën e nisi te KFF Vizioni në Ferizaj, më pas luajti për KFF Hajvalinë dhe KFF Mitrovicën, ku fitoi trofetë kryesorë në futbollin e femrave dhe përfaqësoi klubin edhe në UEFA Women’s Champions League.

Pas paraqitjeve në Kosovë, ajo vazhdoi karrierën te Trabzonspor në Turqi dhe më pas te Servette FCCF në Zvicër, ku fitoi titullin kampion dhe Kupën e Zvicrës. Sipas njoftimit të publikuar nga Ajeti, duke iu referuar konfirmimit të klubit zviceran, transferimi i Misinit te Bayer Leverkusen është më i madhi në historinë e Servette FCCF.

Ajeti theksoi gjithashtu se Misini vazhdon të jetë një nga figurat kryesore të Kombëtares së Kosovës, ku mban edhe rolin e zëvendëskapitenes, duke e cilësuar atë si frymëzim për gjeneratat e reja të futbollisteve kosovare.