Nënvarianti i ri i Covidit nuk përbën shqetësim të madh, sipas ECDC  

Qendra Evropiane për Parandalimin dhe Kontrollin e Sëmundjeve (ECDC) njoftoi se nënvarianti i fundit i Covid-19, me përhapje të shpejtë, nuk përbën një rrezik të madh për shumicën e njerëzve në Evropë.

Ekspertët paralajmëruan në një vlerësim të publikuar sot, se personat e pambrojtur si të moshuarit, të pavaksinuarit ose ata me sistem imunitar të komprometuar janë në një rrezik mesatar deri në të lartë nga nënvarianti i Omicron, XBB.1.5, transmeton dpa, përcjell albinfo.ch.

“Rreziku për popullsinë e përgjithshme në gjithë Zonën Ekonomike Evropiane nga nënvarianti pritet të jetë i ulët”, sipas ekspertëve.

“Ekzistojnë disa boshllëqe njohurish me XBB.1.5 dhe ky vlerësim mund të ndryshojë në javët e ardhshme, pasi të bëhen të disponueshme më shumë prova”, thuhet në raportin e ECDC-së.

Nënvarianti XBB.1.5 i llojit Omicron është përhapur gjerësisht në SHBA, por mbetet ende i rrallë në Evropë.

Megjithëse, normat e përgjithshme të infeksionit të Covid-19 në Evropë janë relativisht të ulëta, ECDC-ja me seli në Stokholm parashikon që nënvarianti XBB.1.5 të përhapet shpejt.