Në Zvicër, Cyrihu renditet stacioni më luksoz në botë

Cyrihu kryeson listën globale, duke lënë pas stacionet kryesore të Japonisë

Në Zvicër, stacioni kryesor hekurudhor i Cyrihut Hauptbahnhof Zürich është renditur si më luksozi në botë në një vlerësim ndërkombëtar të ri, përcjell albinfo.ch.

Sipas një studimi të realizuar nga kompania britanike e sigurimeve të udhëtimeve AllClear Travel Insurance, janë analizuar 40 stacione hekurudhore në mbarë botën, duke u bazuar në kritere si sallonet VIP, oferta gastronomike, dyqanet, vlerësimet e udhëtarëve dhe numri i hoteleve luksoze në afërsi.

Cyrihu ka arritur 83 nga 100 pikë, duke u renditur në vendin e parë, falë performancës së lartë në vlerësimet e pasagjerëve dhe ofertës së gjerë tregtare në zonën përreth.

Pas tij renditen disa nga stacionet më të njohura të Japonisë, përfshirë Osaka Station, Kyoto Station dhe Tokyo Station, të cilat gjithashtu kanë marrë rezultate të larta në kategori si gastronomia dhe infrastruktura moderne.

Studimi bazohet në të dhëna të hapura gjeografike dhe një indeks të ponderuar që mat densitetin e shërbimeve dhe cilësinë e përvojës së udhëtarëve në afërsi të stacioneve. /albinfo.ch.

---