Lajme

Në Gjenevë, do të mbahet manifestimi “Përderisa i kujtojmë, ata jetojnë”

Shënimi i 30 gushtit, Ditës Botërore të të Zhdukurve me Dhunë synon t'u bëjë homazh të gjitha viktimave të zhdukjes me dhunë

E enjte, 2 Korrik 2026 - 20:20 albinfo.ch

Me rastin e Ditës Ndërkombëtare të Viktimave të Zhdukjeve me Forcë, Shoqata Kulturore „Dora d’Istria“, në bashkëpunim me shoqata të tjera dhe aktorë të shoqërisë civile, do të organizojë edicionin e dytë vjetor të manifestimit “Marshi për Drejtësi” në Gjenevë të dielën, më 30 gusht 2026, me moton: “Përderisa i kujtojmë, ata jetojnë”.

Shënimi i kësaj dite ndërkombëtare përmes këtij manifestimi synon t’u bëjë homazh të gjitha viktimave të zhdukjeve me dhunë, të shprehë solidaritet me familjet e tyre dhe të rrisë ndërgjegjësimin publik për rëndësinë e të drejtës për të vërtetën, mbështetje për familjet e prekura dhe dinjitetin njerëzor.

Përtej përkujtimit të personave të zhdukur në Kosovë, kjo iniciativë u bën homazh edhe viktimave në Bosnjë dhe Hercegovinë, Kroaci, Ukrainë, Argjentinë, Palestinë, Kili dhe vende të tjera që ende përballen me tragjedinë e zhdukjeve me forcë. Ajo mbart një mesazh universal solidariteti dhe mbrojtjeje të të drejtave të njeriut.

Përfaqësues të autoriteteve zvicerane, institucioneve të Republikës së Kosovës, organizatave ndërkombëtare, shoqërisë civile, shoqatave nga komunitete të ndryshme që jetojnë në Zvicër, si dhe familje të shumta të personave të zhdukur dhe qytetarë, pritet të marrin pjesë në këtë ngjarje.

Pritja e pjesëmarrësve do të fillojë në orën 13:30 në Parc des Cropettes.

Në orën 14:00, Marshimi për Drejtësi do të niset për në Place des Nations, duke ndjekur këtë itinerar: Parc des Cropettes → Rue de Montbrillant → Avenue de France → Place des Nations.

Duke filluar nga ora 14:45, ceremonia zyrtare do të zhvillohet në Place des Nations, me fjalime nga autoritetet zvicerane, përfaqësues të Republikës së Kosovës, organizatave ndërkombëtare dhe komuniteteve të ndryshme pjesëmarrëse.

Një program artistik dhe përkujtimor do t’u bëjë gjithashtu homazh viktimave të të zhdukurve me dhunë .

Organizatorët ftojnë të gjithë komunitetin shqiptar, komunitetet e tjera të prekura dhe të gjithë ata që janë të përkushtuar ndaj vlerave të të drejtave të njeriut, kujtesës dhe drejtësisë të marrin pjesë në këtë marsh paqësor. Sepse përderisa i kujtojmë, ata jetojnë.

Koordinatorë dhe përgjegjës të projektit:

Mirishahe Limani Hiler, Lisa Mazzone, Edon Duraku.

Kontakt: [email protected]