Ambasadorja e Republikës së Shqipërisë në Gjermani, Adia Sakiqi, ka marrë pjesë në eventin “Albanian Startups Diaspora Roadshow – Connecting Capital & Innovation”, i mbajtur në Berlin, albinfo.ch.
Ngjarja u organizua nga agjencia “Startup Albania” në bashkëpunim me EU4Innovation dhe mblodhi startup-e shqiptare, investitorë, sipërmarrës dhe profesionistë të diasporës, me synim forcimin e lidhjeve dhe krijimin e mundësive të reja për inovacion dhe zhvillim.
Sipas njoftimit, aktiviteti shërbeu si një platformë për shkëmbimin e ideve, prezantimin e sipërmarrjeve inovative shqiptare dhe diskutime mbi investimet, bashkëpunimin dhe të ardhmen e ekosistemit shqiptar të startup-eve.
Ambasadorja Sakiqi vlerësoi energjinë, talentin dhe ambicien e themeluesve shqiptarë në mbarë botën, duke theksuar rëndësinë e mbështetjes së iniciativave që lidhin diasporën me zhvillimin ekonomik dhe teknologjik të Shqipërisë.
Në fund të aktivitetit u shprehën falënderime për organizatorët e “Startup Albania”, si dhe për Arjan Ymeri, për organizimin dhe kontributin në realizimin e eventit./Albinfo.ch
