Milionerët zgjedhin Dubain: Tatime të ulëta, luks i lartë

Dubai po tërheq çdo vit gjithnjë e më shumë milionerë, falë politikës së tij me zero tatime mbi të ardhurat, sigurisë së lartë dhe stilit të jetesës luksoze. Sipas kompanisë këshilluese Henley & Partners, vetëm gjatë këtij viti pritet që mbi 9.800 pasanikë të zhvendosen në Emiratet e Bashkuara Arabe,  numër rekord në botë.

Qyteti ka ndërtuar imazhin e vet si “magnet për të pasurit”, duke ofruar stabilitet politik, kushte të favorshme biznesi dhe jetesë pa burokraci. Viza e artë 10-vjeçare është një tjetër arsye pse profesionistë të suksesshëm, pronarë biznesesh dhe themelues kompanish teknologjike po e shohin Dubain si alternativë ndaj qyteteve të shtrenjta si Londra apo Nju Jorku, transmeton rel përcjell albinfo.ch.

Në kontrast, vendet perëndimore po humbin gjithnjë e më shumë milionerë për shkak të taksave të larta dhe politikave tatimore gjithnjë e më strikte. Vetëm Britania mund të humbasë mbi 16.500 milionerë gjatë këtij viti.

Dubai, i njohur për shfaqjet e hapura të pasurisë  nga Burj Khalifa te ishujt artificialë me resorte luksoze  tashmë renditet mes 20 qyteteve me më shumë milionerë në botë, duke pasur mbi 81.000 pasanikë. Vitin e kaluar, atje u shitën 435 shtëpi mbi 10 milionë dollarë, duke tejkaluar tregje tradicionale si Londra e Nju Jorku.

Megjithatë, ky boom ka ngjallur kritika, sidomos për pabarazitë sociale dhe për varësinë nga punëtorët emigrantë me paga të ulëta. Po ashtu, Emiratet janë përballur me presion ndërkombëtar për të forcuar masat kundër pastrimit të parave, sidomos pas fluksit të kapitalit rus pas luftës në Ukrainë.

Për shumë pasanikë, mesazhi i Dubait është i qartë:

“Ne jemi të hapur për biznes”  dhe kjo duket se mjafton për ta kthyer qytetin në një qendër globale të luksit dhe financave.