Mësuesit frankofonë: Gjermanishtfolësit t`i japin përparësi frëngjishtes

Mësimi i një gjuhe të dytë të huaj nuk guxon të shkoje në dëm të mësimit të frëngjishtes, është theksuar në rezolutën e miratuar nga kuvendi i mësuesve

Mësuesit nga Romandia (regjioni i kantoneve frankofone) u kanë drejtuar një apel kantoneve gjermanishtfolëse që të mos e nënvlerësojnë mësimin e gjuhës frënge në shkollat e tyre. Ata në një rezolute të tyre të miratuar të shtunën kanë kërkuar që “gjuha e dytë” e vendit, pra frëngjishtja në këtë rast duhet të mbrohet në mënyrë më efektive.

Mësuesit nga Romandia e shikojnë me qasje kritike tendencën e dhënies përparësi anglishtes, që po ndjekin shkollat e kantoneve gjermanishtfolëse.

Mësimi i një gjuhe të dytë të huaj nuk guxon të shkoje në dëm të mësimit të frëngjishtes, është theksuar në rezolutën e miratuar nga kuvendi i SER (organizata e mësuesve), i mbajtur në Martigny (Valis). Rezoluta në fjalë përmban edhe kërkesa specifike, si fjala vjen, ajo që kantonet, në klasët e ulëta të shkollave fillore t`i japin përparësi frëngjishtes në raport me anglishten. Kërkesa e radhës u drejtohet autoriteteve kantonale e federale, që ato ta aplikojnë ligjin federal mbi gjuhët e vendit.

Këto shqetësime të mësuesve frankofonë lidhen me një qëndrim të Lidhjes së Mësuesve të Zvicrës (LCH) nga java e kaluar ku kërkohet që mësimi i gjuhëve të huaja të unifikohet. Oferta e mësimit të dy gjuhëve të huaja në shkollat fillore duhet të vazhdojë por e detyrueshme duhet të mbetet vetëm njëra prej tyre.