Marrëveshja SHBA–Iran sjell rënie të ndjeshme të çmimit të naftës në tregjet botërore

Çmimet e naftës kanë pësuar një rënie të fortë, ndërsa bursat globale kanë shënuar rritje pas njoftimit për një marrëveshje mes Shteteve të Bashkuara dhe Iranit, e cila parashikon edhe hapjen e Ngushticës strategjike të Hormuzit.

Nafta e papërpunuar ra me 4.7%, duke u tregtuar në 83.24 dollarë për fuçi, ndërsa tregjet reaguan pozitivisht në të gjitha rajonet, nga Evropa deri në Azi.

Në Evropë, bursat kryesore në Gjermani dhe Francë u rritën me 1.7%, ndërsa indeksi i Londrës shënoi një rritje prej 0.6%.

Tregjet ndërkombëtare kanë qenë të paqëndrueshme muajt e fundit, duke reflektuar luhatjet e situatës në Lindjen e Mesme. Para përshkallëzimit të konfliktit, nafta tregtohej rreth 70 dollarë për fuçi, ndërsa gjatë luftës kishte arritur deri në 120 dollarë.

Edhe tregjet aziatike reaguan pozitivisht këtë të hënë, me bursën e Tokios që u rrit me 5%, ndërsa ajo e Koresë së Jugut me 5.2%.

Rajoni aziatik është ndikuar ndjeshëm nga rritja e çmimeve të energjisë, për shkak të varësisë së lartë nga nafta dhe gazi natyror i Lindjes së Mesme.

Megjithatë, ekspertët paralajmërojnë se rikthimi i stabilitetit do të kërkojë kohë, pasi në Ngushticën e Hormuzit ndodhen ende cisterna të bllokuara dhe rifillimi i plotë i qarkullimit dhe prodhimit të naftës mund të zgjasë javë të tëra, duke mbajtur tregjet në një periudhë pasigurie.