Magjia e ngjyrave të shkrira në pikturat e saj ekspozohet në „Armaturen Flamatt“

Për artdashësit, pikturat e bukura të Marigona Tomës janë duke u ekspozuar me sukses në Wünnewil-Flamatt.

Marigona Toma është emër suksesi në fushën e pikturës në Zvicër dhe ndër shqiptarët. Ajo është një artiste që shpalos zemrën e saj në pikturat shumëngjyrëshe.

Për Marigonën, arti në të vërtetë është pasqyrë e jetës, një dritë e hapur e mendjes që të shërben dhe të plotëson.

Kjo piktore vjen nga fshati Stubëll i komunës së Vitisë dhe që nga vitet e hershme të rinisë është përqendruar rreth artit figurativ, ku ka arritur suksese të shumta.

Ajo është një piktore dhe artiste e përkushtuar, pjesëmarrëse në mbi 40 ekspozita kombëtare dhe ndërkombëtare.

Aktualisht ajo jeton dhe krijon në Zvicër, ku vazhdimisht prezantohet me vepra dhe aktivitete artistike, duke mos harruar kurrë vendlindjen e saj.

Punimet e saj prej disa ditësh janë pjesë e një ekspozite që po mbahet në Wünnewil-Flamatt.

“Jam pjesë e ekspozitës kolektive Kunst im Zeughaus ku prezantohem me disa nga punimet e mia bashkëkohore, bashkë me 40 artistë zviceranë.”

Vlen të theksohet se shumë artistë dhe disa klasa shkollore po shfaqin artin e tyre në Armaturën Flamatt, e organizuar nga Komisioni Kulturor Wünnewil-Flamatt.

Ndërkohë, ajo është e vetmja shqiptare që po prezanton 12 pikturat e saj në mesin e 40 artistëve zviceranë.

Zviceranët tregojnë interes të madh për pikturat e saj.

E pyetur se cila është një nga pikturat që është pëlqyer më së shumti nga audienca zvicerane, Marigona tregon se nuk mund të specifikojë njërën më shumë se tjetrën, pasi sipas saj të gjitha e kanë ndjeshmërinë e tyre.

Duke qenë se pikturimi është një profesion dhe në të njëjtën kohë një ndjenjë, për Marigonën të dyja janë të pranishme dhe e përmbushin atë personalisht.

Artistja gjithashtu ka bërë të ditur se kjo nuk është pjesëmarrja e saj e parë në ekspozitat në Zvicër dhe se në të ardhmen do të organizojë edhe shumë të tjera, si për publikun zviceran, ashtu edhe për artdashësit shqiptarë. /Albinfo.ch

---