Lumi Vjosa shpallet Park Kombëtar

Lumi Vjosa në jug të Shqipërisë është shpallur sot Park Kombëtar, me vendim të Këshillit të Ministrave.

Lajmin e bëri të ditur ministrja e Turizmit dhe Mjedisit, Mirela Kumbaro, në komunikimin me gazetarët për vendimet e qeverisë ditën e sotme.

“Kategoria e dytë e mbrojtjes, që është shumë më e lartë nga ajo që kishte një vit më parë, thjesht Park Natyror”, u shpreh Kumbaro.

“Bashkë me 3 degë të tjera të Lumit Vjosë, më konkretisht lumi Drino, lumi Bënç dhe Shushica bëjnë atë që quhet sot Parku i parë në Evropë i një lumi të egër. Një punë shumë e gjatë që kurorëzohet sot me këtë akt ligjor”, tha ministrja.

Ministrja bëri po ashtu të ditur se sipërfaqja e mbrojtur është shtrirë tashmë në mbi 12,727 ha, e gjithë sipërfaqja ujore dhe bregore e lumit bashkë me sipërfaqe të tjera tokësore.

Për shumë vjet me radhë shoqata të ndryshme mjedisore, jo vetëm vendase, kanë ngritur zërin për mbrojtjen e Vjosës. Përgjatë rrjedhës së lumit ishte parashikuar ndërtimi i disa dhjetëra hidrocentraleve, të cilat nuk do mund të realizohen me përfshirjen e Vjosës në kategorinë e një Parku Kombëtar./tch