Lexim nga romani i Stefan Çapalikut “Tirana, një ëndërr e shkurtër”

Leximi i fragmenteve nga një roman turbulent me ​​histori dashurie nga koha e luftës do të zhvillohet më 1 tetor në orën 18:30 në Graz

GRAZ. “Tri histori dashurie në kohë lufte: njëra në Romë, tjetra në Salzburg dhe e treta në Tiranë. Një në botën artistike, një në një manastir, një në Shqipërinë e atëhershme të përfshirë nga lufta. Një roman emocionues dhe turbulent”. Kështu e prezanton organizatori, Biblioteka Shtetërore e Steirmarkut, në Graz, romanin e shkrimtarit të njohur shqiptar, Stefan Çapalikut “Tirana, një ëndërr e shkurtër”, transmeton albinfo.ch. Pjesë të romanit të përkthyer në gjermanishte do të lexohen më 1 tetor në këtë bibliotekë.

Zuzana Finger e ka përkthyer romanin në gjuhën gjermane dhe do ta prezantojë atë, bashkë me autorin.

Në vazhdim, jepet shkurtimisht përmbajtja e romanit: Një pikë boshe në historinë tonë evropiane: Shqipëria në Luftën e Dytë Botërore: Së pari pushtimi nga Italia fashiste, që përbënte një tronditje për shqiptarët, sepse marrëdhëniet e tyre me shtetin fqinj kishin qenë mjaft miqësore prej shekujsh. Më pas, në vitin 1943: Italia kthehet në anën e aleatëve (kundër fashizmit), ushtarët italianë ikin ose bashkohen me partizanët shqiptarë. Këta të fundit luftojnë kundër forcave pushtuese gjermane, ashtu sikurse më parë kundër pushtuesve italianë, marrin pjesë në fshehjen dhe shpëtimin e hebrenjve nga gjermanët dhe marrin pushtetin pas tërheqjes së gjermanëve, një pushtet që së shpejti çon në një diktaturë pas luftimeve të brendshme…

Leximi fillon në orën 18.30 dhe mbaron në orën 20.30. Hyrja, falas.

Adresa: Steiermärkische Landesbibliothek, Veranstaltungssaal, Kalchberggasse 2 / Joanneumsviertel, 8010  Graz

 

---