Kurti u ankohet ambasadorëve të QUINT-it për Serbinë

Zyra e Kryeministrit te Kosoves

Kryeministri i Kosovës, Albin Kurti të premten ka takuar ambasadorët e QUINT-it. Takimi vjen një ditë pasi emisari i Bashkimit Evropian për dialogun, Miroslav Lajçak ngriti shqetësimin për situatën në veri.

Nga Zyra e Kryeministrit të Kosovës u shprehën se në takim me ambasadorët e akredituar në Kosovë u diskutua për procesin e dialogut dhe zbatimin e Marrëveshjes Bazë me Serbinë dhe Aneksin e Zbatimit nga takimi i 27 shkurtit në Bruksel dhe ai i 18 marsit në Ohër ndërmjet të dyja shteteve, përcjellë albinfo.ch.

“Kryeministri Kurti dhe zëvendëskryeministri Bislimi theksuan se Marrëveshja Bazë dhe Aneksi i Zbatimit duhet të zbatohen pa kushte, pa vonesa dhe në mënyrë të plotë. Gjithashtu, u përmend nevoja që BE-ja ta mbajë përgjegjëse Serbinë për shkeljet e vazhdueshme që po i bën marrëveshjes”, u sqarua tutje në komunikatë.

Më 15 maj në Bruksel takohen kryenegociatorët e Kosovës dhe Serbisë për hapat e mëtutjeshëm të dialogut.