Kurti takoi Trumpin për herë të parë: SHBA-ja: Aleat dhe partner i pazëvendësueshëm i Kosovës

Takimi u zhvillua në Nju Jork gjatë Javës së Nivelit të Lartë të Asamblesë së Përgjithshme të OKB-së.

Kryeministri i Kosovës, Albin Kurti, ka takuar për herë të parë presidentin e Shteteve të Bashkuara të Amerikës, Donald Trump, gjatë qëndrimit në Nju Jork për Javën e Nivelit të Lartë të Asamblesë së Përgjithshme të Kombeve të Bashkuara, përcjell albinfo.ch.

Pas takimit, Kurti ka deklaruar se e ka falënderuar Trumpin për forcimin e investimeve në mbrojtje brenda NATO-s, duke theksuar se Kosova synon anëtarësimin në Aleancën Veri-Atlantike.

“Shtetet e Bashkuara të Amerikës janë aleati kryesor, partneri i pazëvendësueshëm dhe miku special i Republikës së Kosovës”, ka shkruar Kurti.

Gjatë vizitës në SHBA, kryeministri kosovar zhvilloi edhe një sërë takimesh me zyrtarë amerikanë, përfaqësues të Kongresit, investitorë dhe pjesëtarë të komunitetit shqiptaro-amerikan. Në këto takime është diskutuar për sigurinë, mbrojtjen, investimet, sundimin e ligjit dhe synimin e Kosovës për anëtarësim në NATO. /Albinfo.ch

---