Kryeministri i Kosovës: Situata në veri ka përparime

Albin Kurti, FB

Kryeministri i Kosovës, Albin Kurti, ka thënë se vendosja e rendit në veri ka përparime të mëdha dhe ligji atje është duke u forcuar.

Përmes një postimi në rrjetin social Facebook, duke përkujtuar fushatën kriminale të Serbisë në shkurtin e vitit 2000, ku ishin vrarë disa civilë e ishin shpërngulur mijëra familje shqiptare, Kurti ka thënë se situata në veri ka ndryshuar edhe nëpërmjet shpalljes si organizata terroriste të organizatave “Mbrojtja Civile” dhe “Brigada e Veriut”, transmeton albinfo.ch.

“Tani pas 24 vitesh nga shkurti i vitit 2000, gjendja në pjesën veriore të qytetit të Mitrovicës dhe në veri të vendit në përgjithësi ka ndryshuar shumë falë angazhimit të Qeverisë së Kosovës dhe strukturave shtetërore të sigurisë. Organizatat kriminale ‘Mbrojtja Civile’ dhe ‘Brigada e Veriut’ janë shpallur organizata terroriste, kurse vendosja e rendit dhe e ligjit në veri ka pasur përparime të mëdha dhe është në rrugë të mbarë për t’u forcuar. Megjithatë, për të vrarët e të torturuarit si dhe për të dëbuarit nga pjesa veriore e Mitrovicës gjatë shkurtit të vitit 2000 duhet të ketë drejtësi”, ka shkruar ai.

Tutje, ai ka theksuar se viktimat do të kujtohen me nderime e dhembshuri, ndërsa premtoi që do të angazhohet për drejtësi.

“Natën mes 3 dhe 4 shkurtit të vitit 2000, në Mitrovicë u vranë: Bashkim Rrukevci, Muharrem Sokoli, Nezir Voca, Shqipe Voca, Remzije Canhasi, Nderim Ajeti, Niman Sejdiu, Sebaha Abrashi, Selime Berisha dhe Nexhmije Xhaka. Viktimat e masakrës së 3 dhe 4 shkurtit 2000 në Mitrovicë, i kujtojmë me nderime dhe dhembshuri, teksa angazhohemi për drejtësi për ta dhe për të dëbuarit si dhe për ligjshmëri, rend dhe kushtetueshmëri të plotë në veri të vendit sikur në çdo pjesë të Kosovës”, ka shkruar ndër të tjera ai.