Lajme

Krienz: Arrestohen katër kosovarë të dyshuar se po punonin “në të zezë”

Në fillim të kontrollimit, disa punëtorë tentuan të fshiheshin. Katër të arrestuarit ishin duke punuar për një nënkontraktor ndërtimi

E premte, 14 Korrik 2023 - 16:00 albinfo.ch

(KEYSTONE/Olivier Maire)

Katër kosovarë të moshës 22 deri në 44 vjeç janë arrestuar në një kantier të madh në qytetin Kriens, Kantoni i Lucernit, nën dyshimin për punë të padeklaruar, transmeton albinfo.ch. Në këtë aksion janë kontrolluar gjithsej 89 persona.

Të mërkurën në mëngjes, policia e Lucernit kreu një kontroll të paparalajmëruar në kantierin e ndërtimit Eichhof West, siç u njoftua të enjten, shkruan sda.ch. Dyshohej për punë të padeklaruar.

Në fillim të kontrollimit, disa punëtorë tentuan të fshiheshin ose të largoheshin. Sipas policisë, katër të arrestuarit ishin duke punuar për një nënkontraktor ndërtimi.

Një hapësirë e re banimi dhe takimi me 270 apartamente me qira do të ndërtohet në ish-arealin industrial, Eichhof në vitet e ardhshme, përcjell albinfo.ch. Punimet e ndërtimit kanë nisur me çmontimin e objekteve të vjetra industriale.