Krasniqi pranon se e ka shkelur Kushtetutën

Është çështje e institucioneve të pavarura të sqarojnë nëse mënyra siç është zgjedhur presidenti është në përputhje ose jo me Kushtetutën

Gjatë dorëzim-pranimit të detyrës së presidentit, sot kryetari i Kuvendit, Jakup Krasniqi, që deri më tani ishte ushtruesi i detyrës së presidentit, ka thënë tha se nuk ka fuqi për të kundërshtuar vendimin e legjislativit të vendit, i cili me votat e deputetëve zgjodhi të martën president Behgjet Pacollin, në një mbledhje të jashtëzakonshme.

Sipas Krasniqit, është çështje e institucioneve të pavarura të sqarojnë nëse është mënyra siç është zgjedhur presidenti është në përputhje ose jo me Kushtetutën. Krasniqi e ka uruar Pacollin për pozitën e presidentit, duke treguar në këtë rast se e respekton vendimin e Kuvendit të Kosovës për zgjedhjen e presidentit.

Gjatë një interviste për gazetën Express, Krasniqi duket se nuk ishte në dijeni se LDK dhe AAK kishin paralajmëruar që Gjykata Kushtetuese të merret me rrjedhën e seancës së Kuvendit. Por Krasniqi kishte një koment për nismën e partive opozitare. “Aha. Është e drejtë e tyre nëse ata mund ta argumentojnë, kanë të drejtë 30 deputetë ta dërgojnë në Gjykatën Kushtetuese”, ka thënë ai.

I pyetur rreth “sms”, të presidentit Pacolli në Kuvend, në ditën e zgjedhjes së tij president, Krasniqi nuk i komentoi, duke thënë t’i komentojnë ata që kanë të bëjnë me “sms”.

Ndërkaq, Pacolli me rastin e pranimit të detyrës së presidentit, ka thënë se do të bashkëpunojë me kryetarin e Kuvendit të Kosovës, Jakup Krasniqi pasi të dy kanë pozita të rëndësishme.