Kosovë, klerikët fetarë bëjnë thirrje për tejkalimin e krizës

Kleri mysliman, katolik dhe protestant në Kosovë në një konference për media, bënë thirrje për dialog.  Ata kërkojnë që kriza politike të tejkalohet

Kriza politike gjashtëmuajshe ka mobilizuar edhe komunitetin fetar në Kosovë, që të kërkojë nga përfaqësuesit e koalicionit dhe opozitës që ta gjejnë një zgjidhje për tejkalimin e ndasive. Kleri mysliman, katolik dhe protestant në Kosovë bënë thirrje për dialog.

Në një konferencë të përbashkët që mbajtën në katedralen “Nënë Tereza” në Prishtinë, myftiu Naim Tërrmava, Ipeshkvi imzot Dodë Gjergji dhe Driton Krasniqi nga Kisha Protestante, kërkuan nga liderët politik kosovarë, që të ulen në një tryezë dhe të gjejnë një zgjidhje për tejkalim të krizës.

Ipeshkvi i Kosovës Dodë Gjergji ka thënë se qëllimi i tyre është që të gjithë njerëzit vullnetmirë tas thërrasin arsyen për mirëkuptim, për dialog dhe për një ndërtim të së ardhmes së fëmijëve dhe të gjithë qytetarëve të Kosovës. “Askush nuk duhet ta kërcënojë njëri-tjetrin me forcën e popullit dhe pushtetit, por me forcën e dialogut”, tha Dodë Gjergji.

Myftiu Naim Tërnava ka ftuar spektrin politik që të gjejnë forcë dhe kurajë për një unitet në mënyrë që të dilet nga kjo situatë. “Kemi thirrur dhe do thërrasim popullin për tolerancë, humanizëm mes vete. Me këtë rast shfrytëzoj rastin që të ftoj spektrin politik të Kosovës që të gjejnë kurajë, forcë, dije, vizion dhe ta gjejnë një unitet veprues për të dal nga kjo situatë në të cilën gjendemi”, tha Tërnava.

Edhe Driton Krasniqi nga Kisha Protestante ka thënë se kjo dalje e përbashkët është që të përçohet një mesazh i paqes për të gjithë njerëzit.

Udhëheqësit fetarë kanë ftuar spektrin politik në vend që të ndjekin shembullin e bashkësive fetare për tolerancë ndërfetare, duke apeluar që të ketë dhe tolerancë politike për të një shtet në dobi të qytetarëve sot dhe në të ardhmen. Mesazhi i tyre vjen në kohën kur polarizimit politike në Kosovë janë shumë të theksuara.