Kosova përfiton vetëm 10 për qind nga privatizimi

Është fjala për 60 milionë euro apo 10 për qind të 590 milionë eurove të grumbulluara deri tani në fondin e privatizimit

Bordi i Drejtorëve të Agjencisë Kosovare të Privatizimit ka marrë vendim që të depozitojë në bankat vendore një pjesë të fondit të privatizimit, që është mbajtur deri tani në mirëbesim jashtë vendit.

Është fjala për 60 milionë euro apo 10 për qind të 590 milionë eurove të grumbulluara deri në fondin e privatizimit.

AKP-ja do të depozitojë mjetet vetëm në bankat që përmbushin kriterin e sigurisë, pasi ajo është e dedikuar që fondet e mirëbesimit t’i ruajë për kreditorët e mundshëm dhe punëtorët legjitimë, thotë për Radio Kosovën, Yll Kaloshi.

Ekspertë të ekonomisë këtë e vlerësojnë si hap pozitiv, ndonëse të vonuar, dhe rekomandojnë që edhe pjesa tjetër e fondit të investohet në Kosovë, në sektorë të ndryshëm ekonomikë.

Në një njoftim për medie, Bordi i AKP-së siguron se Agjencia do të jetë e kujdesshme gjatë këtij procesi dhe do të investojë në përputhje me ligjin e vet dhe kriteret që ka hartuar për këtë qëllim.