Kosova e gatshme për të ndihmuar Kroacinë, pas tërmeteve të fundit

Ministrja e Punëve të Jashtme dhe Diasporës e Republikës së Kosovës, Meliza Haradinaj- Stublla, ka reaguar pas tërmetit që goditi edhe sot Kroacinë, duke shprehur ngushëllime familjeve të viktimave, dhe solidaritet të plotë me Kroacinë dhe popullin mik kroat.

Ministrja Haradinaj-Stublla është shprehur se Kosova qëndron fuqishëm përkrah Kroacisë në këtë kohë të vështirë për popullin kroat dhe qytetarët e prekur atje, dhe është e gatshme të ofrojë ndihmën e saj për çfarëdo që konsiderohet e nevojshme në këto momente.

Ish-kryeministri i Kosovës, Ramush Haradinaj ka kërkuar nga institucionet e Republikës së Kosovës që të nis Taskë-Forcën për kërkim-shpëtim drejt Kroacisë pas termeteve që ndodhën dy ditët e fundit atje.

Përmes një postimi në llogarinë e tij në Facebook, Haradinaj ka thënë që edhe kombi ynë ka kaluar në situata të tilla.

Postimi i plotë i Haradinajt:

“Kroacia është në situatë kritike pas disa tërmeteve që ndodhën dy ditët e fundit. Si komb që kemi kaluar në të tilla situata me humbje njerëzore dhe shumë dëme materiale, kërkoj nga institucionet e Kosovës që të niset Task-Forca për kërkim-shpëtim e Ushtrisë së Kosovës drejt Kroacisë.

Në këto momente të vështira për popullin dhe institucionet e shtetit tonë mik, Kroacisë, shprehim ngushëllime familjeve që humbën të afërmit e tyre, dhe lutemi për shërimin e të lënduarëve. Mbetemi me shpresë se që kjo situatë e rëndë, të përfundojë me sa më pak viktima”, ka shkruar Haradinaj.