Klosi në Zvicër, takime për arsimin profesional dhe pensionet

Arsimi profesional do të jetë në qendër të diskutimeve të takimeve që ministri i Shqipërisë për Mirëqenie Sociale, Blendi Klosi, do të zhvillojë në kuadër të vizitës së tij zyrtare treditore në Zvicër.

Gjatë kësaj vizite Klosi do të takohet me drejtoreshën e Institutit Federal për Arsimin dhe Kualifikimin Profesional SFIVET, Cornelia Oertli dhe do të bëjë vizita në disa qendra hulumtimi dhe shkolla profesionale, ku do të bashkëbisedojë edhe me stafet studimore dhe mësimore në këto shkolla.

Ministri shqiptar i Mirëqenies Sociale do të takohet edhe me Jürg Brechbühl, drejtor i Zyrës Federale të Sigurimeve Shoqërore në Bernë.

Në Agjencinë Zvicerane për Zhvillim dhe Bashkëpunim (DEZA) minstri i Shqipërisë do të takohet me drejtorin Manuel Sager dhe me Shefen e Departamentit për Bashkëpunim me Evropën Juglindore, Ambasadore Elisabeth von Capeller.
Të martën, në përmbyllje të qëndrimit treditor në Zvicër, ministri nga Tirana do të vizitojë Qendrën e Informacionit dhe Teknologjisë së Komunikimit (ICT) të Postës së Zvicrës në Cyrih.