KDI tregon mundësitë për zgjidhjen e situatës në veri të Kosovës

Instituti Demokratik i Kosovës, me qëllim që t’i hapet rrugë shtensionimit të plotë në veri të Kosovës, ka vlerësuar se kryetarët aktualë të komunave në veri të Kosovës duhet të shqyrtojnë dorëheqjet nga pozitat e tyre, për t’u mundësuar qytetarëve zgjedhjen e përfaqësuesve të tyre legjitimë, bëhet e ditur përmes një komunikate për media, shkruan albinfo.ch.

Ky institut ka përcjellë zhvillimet lidhur me mandatin e kryetarëve të katër komunave veriore, të zgjedhur në procesin e mbajtur më 23 prill të këtij viti. Kryetarët ishin zgjedhur në një proces të improvizuar të votimit që, ndonëse plotësoi kriteret minimale ligjore, u karakterizua me dalje tejet të ulët të votuesve – duke e cenuar ndjeshëm legjitimitetin e tyre politik.

KDI e konsideron të gabuar zhvendosjen e komunikimit për zgjedhjet në komunat veriore nga Qeveria vetëm në nivel ndërkombëtar, duke anashkaluar diskutimet me serbët lokalë dhe përfaqësuesit e tyre politikë”, thotë KDI.

“Me qëllim që t’i hapet rrugë shtensionimit të plotë, kryetarët aktualë të komunave duhet të shqyrtojnë dorëheqjet nga pozitat e tyre, për t’u mundësuar qytetarëve zgjedhjen e përfaqësuesve të tyre legjitimë. Dorëheqjet po ashtu mundësojnë një proces të ri zgjedhor në afate më të afërta kohore, pa vonesa procedurale dhe kosto të dyfishtë”, thonë nga ky institut.

Në anën tjetër, KDI u ka bërë thirrje qytetarëve të katër komunave veriore në Kosovë, në veçanti atyre nga radhët e komunitetit serb, si dhe subjekteve politike që përfaqësojnë interesat e tyre, që të zotohen se do të marrin pjesë në zgjedhje, me qëllim që dorëheqjet e kryetarëve të mos sjellin një proces të ri, por me rezultat të njëjtë.