Kapet banda ballkanike e drogës me 180 kg. marihuanë

Në një rezervoar të përgatitur enkas në kamion, një qen gjurmues ka gjetur me nuhatje 160 kilogramë marihuanë. 20 kg janë gjetur në njërën nga banesat e bastisura

Policia ka kapur në Sarstedt, Landi Niedersachsen (Saksonia e ulët) të Gjermanisë tre persona, të cilëve u ka konbfiskuar plot 180 kilogramë drogë të llojit marihuanë në vlerë të 400 mijë eurove. Siç bën të ditur Zyra për Kriminalitet e Landit (LKA) në Hannover, të arrestuarit janë: një shtetas shqiptar, një serb dhe një malazez të moshave 34 deri 39 vjeçare, shkruan dpa.de.

Në tetor ishin arrestuar në Kempten të Bavarisë dy bashkëpunëtorë të bandës, te të cilët ishin gjetur 10 kilogramë drogë nga një dërgesë e mëparshme, transmeton albinfo.ch. “Ne konsiderojmë se banda edhe më herët, në mënyrë të përsëritur ka kontrabanduar drogë nga Ballkani në Gjermani dhe e ka shpërndarë atë në gjithë vendin”, thotë një zëdhënës i LKA.

Ndërkaq, policia u ka rënë në gjurmë që nga muaji prill por ka intervenuar të martën me rastin e një dorëzimi të planifikuar të drogës në Sarstedt, transmeton albinfo.ch. Me këtë rast, policët kanë arrestuar në Hanover ngasësin e një kamioni, një shtetas 34 vjeçar të Malit të Zi dhe një shtetas serb po ashtu 34 vjeçar, ngasës të një makine të vogël transportuese (pick-up).

Në një rezervoar të përgatitur enkas në kamion, një qen gjurmues ka gjetur me nuhatje 160 kilogramë marihuanë. Ndërsa me rastin e bastisjeve të bëra në banesa në Sarstedt dhe Hannover, është arrestuar një shtetas shqiptar i moshës 39 vjeçare. Te ai janë gjetur edhe 20 kilogramë marihuanë, 23 mijë euro para të gatshme dhe dy automobilë.