Kamberi: I gëzuar që SHBA-ja po e shtyn përpara realizimin e Planit 7 pikësh

Foto FB: Shaip Kamberi

Deputeti shqiptar në Parlamentin e Serbisë, Shaip Kamberi, është shprehur i lumtur që Shtetet e Bashkuara të Amerikës po e shtyjnë përpara fillimin e realizimit të “Planit 7 pikësh”, duke theksuar se njohja e diplomave duhet të jetë hapi i parë.

Përmes një postimi në rrjetin social “Facebook”, Kamberi ka shkruar për vizitën e ambasadorit të OBE-së, Jan Braathu dhe ambasadorit të SHBA-së në Serbi, Christopher Hill, teksa ka thënë se njohja e diplomave duhet të jetë hapi i parë, transmeton albinfo.ch.

“Ambasadori i OSBE-së, Jan Braathu dhe Ambasadori i SHBA-së, Chritopher Hill, pas vizitës së tyre në Luginë të Preshevës, të premtën që e lëmë pas, kanë takuar kryeministren në ikje e kryeparlamentaren në ardhje, Ana Brnabiq. Temë e këtij takim ishte fillimi i realizimit të Planit 7 Pikësh. Edhe pse i aprovuar në vitin 2013, i harmonizuar me konventat ndërkombëtare e legjislacionin vendor e i sinkronizuar me faktorin ndërkombëtar, realizimi i tij ende nuk ka filluar. Më gëzon angazhimi i OSBE dhe i Shteteve të Bashkuara të Amerikës për të shtyrë përpara fillimin e realizimit të Planit 7 pikësh. Njohja e diplomave duhet të jetë hapi i parë”, ka shkruar ai.

Ndryshe, “plani 7 Pikësh” është dokument i nënshkruar nga zyrtarë të Luginës së Preshevës në vitin 2013 dhe për qëllim kishte nisjen e negociatave me Serbinë për t’i zgjidhur problemet e shqiptarëve. Në dokument përfshihet integrimi i plotë i shqiptarëve, siguria e plotë, arsimi, kultura dhe çështje të tjera.