Izraeli dërgon delegacion për bisedimet e armëpushimit

Keystone (AP Photo/Leo Correa)

Kryeministri i Izraelit, Benjamin Netanyahu, ka njoftuar se një delegacion izraelit do të udhëtojë drejt Katarit të dielën për të vazhduar bisedimet për një marrëveshje armëpushimi në Rripin e Gazës. Megjithatë, ai hodhi poshtë kategorikisht kërkesat e reja të paraqitura nga Hamasi për ndryshime në draft-marrëveshjen aktuale, shkruan DW, transmeton albinfo.ch.

“Ndryshimet që Hamasi po kërkon të bëjë në propozimin e Katarit na u përcollën mbrëmë dhe janë të papranueshme për Izraelin,” thuhet në një deklaratë të publikuar nga zyra e Netanyahut.

Pavarësisht kundërshtimit, Izraeli konfirmoi se do të vazhdojë përpjekjet diplomatike dhe se ekipi negociator do të fluturojë për në Katar për të “vazhduar përpjekjet për të siguruar kthimin e pengjeve tona”, bazuar në draftin e propozuar që gëzon mbështetjen e SHBA-së dhe është negociuar përmes Katarit dhe Egjiptit.

Nga ana tjetër, Hamasi nuk ka bërë publike detaje konkrete lidhur me përgjigjen e tij, por të premten njoftoi se kishte reaguar ndaj draftit “me një frymë pozitive”, transmeton albinfo.ch.

Presidenti i Shteteve të Bashkuara, Donald Trump, ka rritur angazhimin diplomatik për t’i dhënë fund konfliktit që ka zgjatur tashmë gati 21 muaj në Gaza. Ai ka ftuar kryeministrin Netanyahu në një takim në Uashington, i cili do të mbahet të hënën.

Vizita pritet të jetë vendimtare në përpjekjet për të finalizuar një marrëveshje armëpushimi që synon jo vetëm ndalimin e luftimeve, por edhe kthimin e pengjeve izraelite dhe lehtësimin e situatës humanitare në Gaza, transmeton albinfo.ch.