Italia rihap kufijtë me shtetet e zonës Schengen, jo më karantinë 14-ditore

Sa u përket udhëtimeve me shtetet e tjera të botës, masat kufizuese do të jenë në fuqi të paktën deri më 15 qershor

Duke nisur nga dita e sotme, Italia rihap kufijtë me të gjitha shtetet e zonës Schengen, duke përfshirë edhe Zvicrën.

Kjo do të thotë se të gjithë vizitorët e huaj do të futen në Itali pa u detyruar t’i nënshtrohen karantinës 14 ditore.

Lehtësimet në udhëtime brenda Unionit do të jenë më të shumta e më të dukshme pas 1 korrikut kur hyn në fuqi edhe certifikata e gjelbër e Covid-19, transmeton Euronews, përcjell Albinfo.ch.

Sa u përket udhëtimeve me shtetet e tjera të botës, masat kufizuese do të jenë në fuqi të paktën deri më 15 qershor.

Gazetari shqiptar, Arbër Agalliu, sqaroi në Euronews Albania se përsa u përket shtetasve shqiptarë, hyrja në Itali do të jetë sipas rregullave të mëparshme, me një tampon të bërë brenda 48 orëve të fundit.

Ai shtoi se ky shtet po shkon drejt normalitetit, ku vijon masivisht edhe procesi i vaksinimit.

Aktualisht në Itali janë 210,050 persona të infektuar me COVID-19.

Po kështu në 24 orët e fundit kanë rezultuar 2,897 raste të reja dhe kanë humbur jetën 62 persona.

 

---