iPhone 18 mund të jetë dukshëm më i shtrenjtë se modelet aktuale, ja pse

Rritja e kostove të memories DRAM, e nxitur nga kërkesa e madhe e qendrave të të dhënave për inteligjencë artificiale, mund të ndikojë edhe në çmimin e gjeneratës së ardhshme të iPhone.

Apple mund të përballet me rritje të kostove të prodhimit për serinë e ardhshme të iPhone 18, veçanërisht për shkak të çmimeve në rritje të memories DRAM, trandmeton albinfo.ch.

Kërkesa e madhe për komponentë memorieje nga qendrat e të dhënave që përdoren për inteligjencën artificiale po ushtron presion mbi furnizimin dhe çmimet e DRAM-it. Kjo situatë mund të reflektohet edhe në çmimet e pajisjeve të reja të Apple.

Sipas raportimeve, iPhone 18 Pro mund të jetë deri në 300 dollarë më i shtrenjtë se modelet përkatëse të gjeneratave të mëparshme, megjithëse çmimi përfundimtar nuk është konfirmuar nga Apple.

Rritja e kostove nuk do të ishte e pazakontë për kompaninë. Apple tashmë ka rritur çmimet e disa produkteve, përfshirë Mac, iPad dhe Vision Pro, ndërsa rritja e kostove të komponentëve mund të ndikojë edhe në linjën e iPhone.

 

 

Apple teston çipat e memories nga Kina

Sipas The Wall Street Journal, Apple ka nisur të testojë çipat e memories të prodhuesit kinez CXMTpër përdorim në iPhone dhe MacBook, kryesisht për pajisjet që synohen për tregun kinez.

Megjithatë, përdorimi i komponentëve të prodhuar nga CXMT mund të jetë i ndërlikuar për shkak të kufizimeve të vendosura nga Shtetet e Bashkuara ndaj kompanive kineze.

Për më tepër, iPhone 18 Pro thuhet se ndodhet tashmë në një fazë të avancuar të zhvillimit dhe nuk pritet të përdorë çipat e memories së CXMT.

Për Apple, bashkëpunimi me CXMT nuk do të shërbente vetëm si një mënyrë për të ulur kostot e prodhimit. Kompania mund ta shohë atë edhe si një alternativë për të siguruar furnizim më të qëndrueshëm me memorie në të ardhmen.

Nëse presioni mbi tregun e memories vazhdon, konsumatorët mund të përballen me çmime më të larta për modelet e ardhshme të iPhone, veçanërisht për versionet Pro./Albinfo.ch

---