“Innovation & Leadership Conference 2026”, platformë që lidh inovacionin, biznesin dhe lidershipin shqiptar në Zvicër

Më 6 qershor 2026, në Bern të Zvicrës do të mbahet konferenca “Innovation & Leadership Conference 2026”, një organizim që synon të bashkojë profesionistë, akademikë, studentë dhe përfaqësues të industrisë shqiptare në Zvicër dhe Evropë.

Në një intervistë për albinfo.ch, organizatorja Dr. Blerta Berisha Morina, anëtare e Bordit – udhëheqëse për Komunikim dhe Marketing, Albanian Engineering of Switzerland AES,  flet për qëllimin e konferencës, temat që do të trajtohen dhe rëndësinë e krijimit të një platforme të qëndrueshme për networking dhe bashkëpunim profesional.

albinfo.ch: Cili është qëllimi konkret i konferencës “Innovation & Leadership Conference 2026”?

Dr. Blerta Berisha Morina: Qëllimi kryesor i kësaj konference është të krijojë një platformë strategjike ku bashkohen inovacioni, lidershipi, shkenca, teknologjia dhe biznesi. Synimi ynë është të ndërtojmë ura bashkëpunimi mes profesionistëve shqiptarë, institucioneve akademike, industrisë dhe partnerëve ndërkombëtarë.

albinfo.ch: Kujt i dedikohet më së shumti kjo konferencë?

Dr. Blerta Berisha Morina: Konferenca i dedikohet studentëve, profesionistëve, sipërmarrësve dhe institucioneve që kërkojnë zhvillim profesional, networking dhe partneritete strategjike. Ne duam të krijojmë një urë reale mes gjeneratës së re dhe liderëve të industrisë.

albinfo.ch: Sa pjesëmarrës dhe sa folës pritet të marrin pjesë në Bern?

Dr. Blerta Berisha Morina: Këtë vit presim pjesëmarrje të gjerë nga Zvicra dhe diaspora shqiptare në Evropë. Konferenca do të mbledhë tetë folës të konfirmuar nga fusha të ndryshme si biznesi, ekonomia, teknologjia, shkenca dhe mjekësia.

albinfo.ch: Cilët janë disa nga emrat kryesorë që do të jenë pjesë e konferencës?

Dr. Blerta Berisha Morina: Disa nga speaker-at e konfirmuar janë Prof. Hetem Ramadani, Prof. Dr. Fadil Çitaku, Dr. Sali Sefa, Dr. Kaltrina Paloja, Dr. Adhurim Haxhimusa, Afrim Morina dhe Dr. Sulejman Vejseli.

albinfo.ch: Çfarë temash konkrete do të diskutohen gjatë eventit?

Dr. Blerta Berisha Morina: Fokus do të kenë inovacioni në biznes dhe industri, transformimi digjital, inteligjenca artificiale, lidershipi modern, edukimi dhe bashkëpunimi mes akademisë dhe industrisë.

albinfo.ch: Pse keni zgjedhur pikërisht temën e inovacionit dhe lidershipit këtë vit?

Dr. Blerta Berisha Morina: Sepse tregu global sot kërkon jo vetëm ekspertizë teknike, por edhe aftësi për të udhëhequr ndryshimin. Inovacioni dhe lidershipi janë dy elementë kyç për suksesin në të ardhmen.

albinfo.ch: Çfarë mund të përfitojnë të rinjtë shqiptarë nga pjesëmarrja?

Dr. Blerta Berisha Morina: Të rinjtë do të kenë mundësi për mentorim, networking me kompani dhe institucione, orientim profesional dhe frymëzim për ndërtimin e karrierës në Zvicër dhe më gjerë.

albinfo.ch: A do të ketë mundësi networking-u me kompani dhe institucione zvicerane?

Dr. Blerta Berisha Morina: Po, networking-u është një nga shtyllat kryesore të konferencës. Pas eventit do të organizohet edhe një “Network Dinner” ekskluziv për speaker-at, sponsorët dhe pjesëmarrësit.

albinfo.ch: Si e vlerësoni pozitën e profesionistëve shqiptarë në tregun zviceran të punës?

Dr. Blerta Berisha Morina: Profesionistët shqiptarë kanë krijuar një prezencë shumë të fortë në Zvicër në fusha si teknologjia, financa, mjekësia dhe akademia. Ata janë shembull i integrimit dhe profesionalizmit.

albinfo.ch: Çfarë e dallon këtë konferencë nga organizimet e tjera?

Dr. Blerta Berisha Morina: Kombinimi i ekspertizës akademike, përvojës së industrisë, diasporës shqiptare dhe partnerëve ndërkombëtarë e bën këtë konferencë unike. Nuk është vetëm event, por një platformë bashkëpunimi afatgjatë.

albinfo.ch: A synoni që kjo konferencë të organizohet çdo vit?

Dr. Blerta Berisha Morina: Po, vizioni ynë është që kjo konferencë të kthehet në një platformë vjetore dhe pikë referimi për komunitetin profesional shqiptar në Zvicër dhe Evropë.

albinfo.ch: Cili është mesazhi juaj për të rinjtë shqiptarë?

Dr. Blerta Berisha Morina: Të investojnë në edukim, të ndërtojnë rrjetin profesional dhe të krijojnë reputacion përmes punës, integritetit dhe qëndrueshmërisë.

albinfo.ch: Çfarë prisni konkretisht nga edicioni i këtij viti?

Dr. Blerta Berisha Morina: Presim krijimin e partneriteteve të reja dhe bashkëpunimeve afatgjata mes akademisë, industrisë dhe komunitetit shqiptar ndërkombëtar. Gjithashtu mirëpresim sponsorë dhe partnerë strategjikë që besojnë në fuqizimin e talenteve, inovacionit dhe lidershipit.

Rzervoni vendin tuaj: https://aesipak-summit.com/

---