Imelda Prifti përfaqëson artin shqiptar në Kanada në ekspozitën “Women’s Voices”

Piktorja shqiptare u prezantua me veprën “Roses Abstract” në një ekspozitë të organizuar në kuadër të Ditës Ndërkombëtare të Gruas

Piktorja shqiptare që jeton dhe vepron në Kanada, Imelda Prifti, vazhdon të jetë aktive në skenën artistike, duke marrë pjesë në ekspozita që promovojnë artin dhe fuqizimin e zërit të grave, transmeton albinfo.ch.

Ajo ka bërë të ditur se pjesëmarrja në ekspozita për të është gjithmonë një ndjenjë krenarie dhe kënaqësie, por mbi të gjitha një proces i vazhdueshëm vetëvlerësimi dhe kërkimi artistik. Sipas saj, takimi me artistë të ndryshëm dhe shkëmbimi i përvojave e pasuron rrugëtimin krijues dhe i jep artit një dimension më të thellë.

Një nga përvojat më frymëzuese për Imelda Priftin ka qenë pjesëmarrja në ekspozitën “Women’s Voices”, organizuar nga Women’s Art Association of Canada, në kuadër të International Women’s Day. Ekspozita u zhvillua në dy pjesë dhe kishte në fokus fuqizimin dhe shprehjen artistike të grave.

Në këtë event, Imelda Prifti u përfaqësua me veprën e saj “Roses Abstract”, e cila u përzgjodh për ekspozim. Artistja ka treguar se frymëzimi dhe titulli i punimit lidhen me këngën “Days of Wine and Roses”, e cila shërbeu si pikënisje për të krijuar një ndjesi estetike dhe emocionale të veçantë.

Përmes kësaj pikture, ajo synon të përcjellë një atmosferë delikate, mes pranverës dhe bukurisë së trëndafilave, ku ngjyrat dhe ndjesitë bashkohen në harmoni.

Imelda Prifti thekson se arti për të mbetet një udhëtim i pandërprerë drejt vetëzbulimit dhe një mënyrë për të shprehur emocione që shpesh tejkalojnë fjalët./Albinfo.ch

---