I akuzuari për planifikimin e një sulmi terrorist: “ISIS më kishte shpëlarë trurin”

Vetëm 19 vjeç dhe tashmë përballë drejtësisë në Gjykatën Penale Federale të Zvicrës. I veshur me pantallona të zeza dhe bluzë të bardhë, i riu paraqitet i qetë dhe u përgjigjet pyetjeve të kryesueses së trupit gjykues.

Shtetasi zvicerano-turk përballet me akuza të rënda. Prokuroria Federale e akuzon se kishte planifikuar një sulm terrorist në emër të të ashtuquajturit “Shteti Islamik” (ISIS).

Vendndodhja e saktë e sulmit të dyshuar nuk dihet. Sipas Prokurorisë Federale, i riu kishte hyrë në një proces radikalizimi dhe, pak para arrestimit, kishte pasur kontakte të drejtpërdrejta me persona të tjerë që mbështesnin ISIS-in, me të cilët kishte diskutuar edhe mënyra të mundshme për të vepruar.

Në një bisedë me një person me të njëjtin orientim, ai kishte shkruar: “Vëlla, ta zëmë se përplasim makinën me turmën ose thjesht therim njerëz rastësisht në qytet.”

“Nuk kam pasur ndërmend të kryej sulm”

Në sallën e gjyqit në Bellinzona, i akuzuari këmbënguli se nuk kishte planifikuar kurrë të kryente një sulm. Ai tha se kishte qenë duke “bërë kërkime” për të mësuar më shumë rreth ISIS-it dhe se veçanërisht ishte interesuar për mënyrën se si organizata e justifikonte kryerjen e akteve të dhunshme.

Këtë qëndrim ai e përsëriti gjatë pjesës më të madhe të dëshmisë: sipas tij, bëhej fjalë për kureshtje dhe kërkim informacioni, jo për qëllime kriminale.

Megjithatë, në muajt para arrestimit të tij, në qershor të vitit 2025, ai ishte pa dyshim simpatizant i ISIS-it. Sipas deklarimeve të tij, nuk kishte qenë as mbështetës aktiv dhe as anëtar i organizatës, duke pretenduar se kishte ruajtur një qëndrim kritik.

Por ai pranoi se shihte edhe disa elemente pozitive në propagandën e ISIS-it. Ndër të tjera, përmendi idenë e krijimit të një shteti të veçantë “ku do të zbatoheshin rregullat e Zotit”. Ai gjithashtu e kishte parë pozitivisht, sipas propagandës së organizatës, mbështetjen që u jepej myslimanëve në nevojë.

“ISIS më kishte shpëlarë trurin”

Gjatë marrjes në pyetje, kryesuesja e trupit gjykues nuk e fshehu plotësisht habinë e saj.

Si mund të pretendohej se bëhej fjalë vetëm për kërkim informacioni, kur ISIS ishte përgjegjës për vrasje dhe ekzekutime brutale?

Edhe gjatë gjyqit, kur u pyet për prerjet e kokave dhe vrasjen e “jobesimtarëve”, i riu tha se ende ishte duke “mësuar” dhe se nuk mund të thoshte nëse i mbështeste apo jo këto veprime.

Kryesuesja e gjykatës e pyeti drejtpërdrejt: “Duke pasur parasysh mizoritë e kryera nga ISIS, çfarë ka për të mësuar?”

I riu e përshkroi procesin e tij si një lloj kërkimi krahasues. Ai tha se kishte studiuar rryma të ndryshme të Islamit, kishte bërë pyetje në xhami, por pjesën më të madhe të kërkimeve e kishte kryer në internet.

Më pas, sipas tij, ishte përfshirë gjithnjë e më shumë në forume ku shpërndahej propaganda e ISIS-it. Ai ndiqte grupe të shumta në Telegram dhe komunikonte me persona me pikëpamje të ngjashme.

Përfundimi i tij sot është i prerë: “ISIS më kishte shpëlarë trurin.”

Pjesën më të madhe të kohës e kalonte online

Sipas akuzës, në periudhën para arrestimit, i riu kalonte pjesën më të madhe të ditës në internet, përmes telefonit të tij, duke ndjekur forume dhe dhoma bisedash. Propaganda e ISIS-it duket se kishte zënë një pjesë të rëndësishme të jetës së tij në atë periudhë.

Sot, ai pretendon se e sheh gjithçka ndryshe dhe se i konsideron sulmet e ISIS-it çnjerëzore.

Prokurori federal e pyeti më tej nëse, në atë kohë, ai besonte se ishte e justifikuar të vriteshin njerëzit që nuk besonin në Islam.

Përgjigjja e tij ishte: “Ende po bëja kërkime dhe nuk mund ta kujtoj.”

Është liruar nga paraburgimi

I riu u lirua nga paraburgimi në dhjetor dhe aktualisht po ndiqet nga njësia përkatëse e Policisë Kantonale të Aargaut.

Ai po merr gjithashtu trajtim psikoterapeutik ambulator.

Çështja tashmë është para Gjykatës Penale Federale, e cila duhet të vlerësojë nëse veprimet dhe kontaktet e tij përbëjnë prova të mjaftueshme për akuzat e ngritura nga Prokuroria Federale/albinfo.ch/

---