Hidhet poshtë iniciativa për pagën minimale

Iniciativa kërkonte që pagesa minimale për një orë pune të jetë 22 franga ose paga mujore, së paku 4000 franga bruto

Dhoma e Kantoneve e parlamentit të Zvicrës ka hedhur poshtë iniciativën për pagën minimale, që është iniciuar nga sindikatat e Zvicrës. 31 deputetë kanë votuar kundër kësaj iniciative ndërsa 13 pro. Duke marrë këtë qëndrim, kjo dhomë i është përgjigjur pozitivisht rekomandimit të komisionit për ekonomi dhe taksa.

Iniciativa popullore për pagën minimale kërkon që pagesa minimale për një orë pune të jetë 22 franga ose paga mujore për një vend pune me normë të plotë,  së paku 4000 franga bruto. Por, shumica në Dhomën e Kantoneve ishte e mendimit se një veprim i tillë do të ishte i dëmshëm për ekonominë e Zvicrës.

Sipas qëndrimit mbizotërues, lartësia e pagave duhet të rregullohet në degët përkatëse të ekonomisë me marrëveshjet e përgjithshme që vlejnë brenda tyre. Për këtë arsye Dhoma e Kantoneve i ka kërkuar Qeverisë Federale që të shpejtojë procedurat për lidhjen e marrëveshjeve të përgjithshme të punës.