Gryka e Rugovës shndërrohet në destinacion të ngjitjes në shkëmbinj

Këtë javë është hapur edhe zona e re e ngjitjes në shkëmbinjtë e njohur si “VIP-Balcony” e cila në përbërjen e saj ka 15 vija të reja të ngjitjes

Gryka e Rugovës gjithnjë e më shumë është duke u shndërruar në një nga zonat më atraktive në Kosovë e po ashtu destinacion konkurrent në Evropë si një destinacion i turizmit të aventurës, transmeton albbinfo.ch.

Këtë javë është hapur edhe zona e re e ngjitjes në shkëmbinjtë e njohur si “VIP-Balcony” e cila në përbërjen e saj ka 15 vija të reja të ngjitjes të cilat do t’ju ofrohen vizitorëve për zhvillimin e këtij aktiviteti rekreativ turistik si një nga ofertat më të reja në Pejë.

Durim Sheremeti nga Komuna e Pejës ka thënë se  kjo vijë e re i ndihmon zhvillimit të turizmit dhe pasurimit të ofertës turistike të komunës së Pejës. Ndërsa menaxher i projektit nga “Trentino con il Kossovo”, Elbert Krasniqi, shprehet se përmes këtij përveç mbrojtjes dhe promovimit të natyrës së qëndrueshme, kanë arritur të integrojnë edhe zhvillimin e turizmit.

“Përmes kësaj do të mundësojnë një zhvillim të qëndrueshëm, krijimin e vende të reja të punës për banorët lokal të Pejës si dhe promovimin e Grykës së Rugovës si një destinacion të turizmit të aventurës”, ka thënë Krasniqi.

Projekti Born Borderless Nature është projekt ndërkufitar në mes të Kosovës dhe Malit të Zi i cili fokusohet në mbrojtjen dhe promovimin e biodiversitetit të qëndrueshëm si dhe mundësisë së shfrytëzimit të potencialeve natyrore për zhvillim të turizmit.