Gruda nga PDK: Kushtetuesja e Speciales nuk do të ketë juridiksion për të shfuqizuar ndryshimet në ligj

(KEYSTONE/EPA/ARBEN LLAPASHTICA)

Deputeti i Partisë Demokratike të Kosovës, Përparim Gruda, ka deklaruar se Gjykata Kushtetuese e Dhomës së Specializuar  në Hagë nuk do të ketë juridiksion për ta kontrolluar apo shfuqizuar ndryshimet në Ligjin për Dhomat e Specializuara dhe Zyrën e Prokurorit të Specializuar, nëse miratohen ndryshimet e propozuara nga PDK-ja.

Përmes një postimi në rrjetin social “Facebook”, ai ka shkruar se me ndryshimet e propozuara është hequr shprehimisht kompetenca e Dhomës së Specializuar Kushtetuese për kontrollin e kushtetutshmërisë së këtij ligji.

“Po shoh shumë reagime lidhur me mundësinë që, pas miratimit të ndryshimeve në Ligjin për Gjykatën Speciale, ligji të dërgohet në Dhomën e Specializuar Kushtetuese në Hagë dhe eventualisht të shfuqizohet. Po e sqaroj: me ndryshimet që kemi propozuar në ligj, Dhomës së Specializuar Kushtetuese i është hequr shprehimisht kompetenca për kontrollin e kushtetutshmërisë së ligjit, në çfarëdo forme”, ka shkruar ai, transmeton albinfo.ch.

Sipas tij, kjo është përcaktuar në nenin 23 të projektligjit, i cili, sipas tij, kufizon juridiksionin e Dhomës Kushtetuese në Hagë vetëm në referimet kushtetuese që burojnë nga vendimet, urdhrat apo aktgjykimet e Dhomave të Specializuara dhe Zyrës së Prokurorit të Specializuar.

Duke cituar Amendamentin nr. 24 të Kushtetutës, ai ka thënë se ky përcakton se Dhoma e Specializuar Kushtetuese vendos për referimet kushtetuese në lidhje me Dhomat e Specializuara dhe Zyrën e Prokurorit të Specializuar “në përputhje me ligjin e veçantë”.

“Pikërisht mbi këtë bazë, me nenin 23 të projektligjit tonë e kemi përcaktuar shprehimisht kufirin e juridiksionit të Dhomës Kushtetuese në Hagë”, ka thënë Gruda teksa theksoi se projektligji përcakton që kontrolli i kushtetutshmërisë së këtij ligji dhe i ligjeve që e ndryshojnë, plotësojnë ose shfuqizojnë Ligjin Nr. 05/L-053, i takon Gjykatës Kushtetuese të Kosovës në përbërjen e saj të rregullt në Prishtinë.

“Prandaj, sipas ndryshimeve të propozuara, Dhoma Kushtetuese në Hagë nuk do të ketë juridiksion për ta kontrolluar apo shfuqizuar këtë ligj. Ajo nuk është një Gjykatë Kushtetuese e veçantë nga Gjykata Kushtetuese e Kosovës, por një Dhomë e Specializuar me juridiksion të posaçëm”, ka deklaruar Gruda.