Gjysma e rrogës shkon për shtetin!

Me 49.3% të pagës që shkon për taksa, Gjermania është në vetë kreun e listës së shteteve me taksa të larta

Një i punësuar mesatar i gjinisë mashkullore që jeton i vetëm dhe nuk ka fëmijë duhet “t`ia japë shtetit” gjegjësisht të paguajë tatime pothuaj gjysmën e rrogës së tij. Sipas një studimi të bërë nga OECD të titulluar “Taxing Wages 2014” gjermanëve të kategorisë së përmendur u hiqen nga paga plot 49.3% e shumës nominale.

Me këtë përqindje, Gjermania është në vetë kreun e listës së shteteve me taksa të larta. Ajo është në vendin e parë në mesin e 34 shteteve të OECD-së të përfshira në studim, shkruan focus.de.  

Por, kjo përqindje në Gjermani ka qenë edhe më e lartë në të kaluarën. Kështu, në vitin 2012 gjermani mesatar që jetonte i vetëm dhe që nuk kishte fëmijë ia jepte shtetit 49.6% të të ardhurave të tij ndërsa në vitin 2000 kjo përqindje ishte 52.6%.

Kjo rënie relative shpjegohet me zbritjen e taksave për sigurimin pensional.